Ozodlik Radiosi
8 авг 2023

Қирғизистон: Ўш вилоятида 39 та масжид ва 21 та диний ўқув даргоҳи фаолияти тўхтатилди

Қирғизистоннинг Ўш вилоятида Миллий хавфсизлик давлат қўмитаси, Ички ишлар вазирлиги, Дин ишлари бўйича давлат комиссияси, Фавқулодда вазиятлар вазирлиги, Соғлиқни сақлаш вазирлиги, президентнинг Ўш вилоятидаги ваколатхонаси, “Кадастр” давлат муассасаси ва Мусулмонлар диний идораси ходимларидан иборат гуруҳ диний объектлар фаолияти бўйича текширув олиб борган. Бу ҳақда Озодликнинг қирғиз хизмати МХДҚ матбуот хизматидан олинган маълумотга таянган ҳолда хабар қилди.

Қайд этилишича, текширув “диний экстремизм ва ноанъанавий диний оқимлар ғояларининг ёйилишига қарши курашиш ва диний вазиятни соғломлаштириш” доирасида ўтказилган.

Муассасалараро ишчи гуруҳ маълумотига кўра, Ўш вилоятида “аҳолининг реал эҳтиёжларини ҳисобга олмаган ҳолда диний объектларнинг хаотик қурилиши” ва диний ўқув даргоҳларида ягона таълим стандартларининг йўқлиги радикал-экстремистик ғоялар ёйилишига шароит яратиб, диний вазиятга салбий таъсир кўрсатмоқда.

Текширув якунига кўра “Эътиқод эркинлиги ва диний ташкилотлар тўғрисида”ги қонун талабларининг, меъморий-қурилиш, санитар-эпидемиологик меъёрлар ва ёнғин хавфсизлиги талабларининг бузилиши аниқланган. Натижада 48 та масжид ва 40 та диний ўқув даргоҳига нисбатан ёзма кўрсатмалар берилган. Айни пайтда 39 та масжид ва 21 та ўқув даргоҳи фаолияти тўхтатилган, 39 та диний объектга нисбатан жарималар тайин қилинган. Шунингдек, насронийларга тегишли 18 та диний объект фаолияти ҳам текширилган.

Аввалроқ муассасалараро комиссия Жалолобод вилоятида 60 та масжид ноқонуний фаолият юритаётганини аниқлагани хабар қилинганди.

Сўнгги маълумотларга кўра, шу кунда Қирғизистонда 2 минг 600 тага яқин масжид, қарийб 100 та мадраса ва 10 та исломий институт фаолият олиб бормоқда.

Комментарии