Европа Иттифоқининг Тошкентдаги ваколатхонасида Ўзбекистон инсон ҳуқуқлари “Эзгулик” жамияти мамлакатдаги инсон ҳуқуқлари вазиятига доир ҳисоботи тингланди.

Жамият вакили Абдураҳмон Ташановга кўра, сўнгги ойларда халқаро ташкилотлар ва дипломатик корпус ваколатхоналарининг мамлакатдаги инсон ҳуқуқлари аҳволига эътибори кучайгани сезилмоқда.
13 февраль куни ўтган ҳисобот тақдимотида Европа Иттифоқи, АҚШ, Германия, Франция, Чехия элчилари, шунингдек, БМТ, ЕХҲТ сингари халқаро ташкилотлар ваколатхоналари раҳбарлари иштирок этди.
Жамият вакили Абдураҳмон Ташановга кўра, бунга қадар ташкилотнинг ҳисоботи тақдимотларида элчи ёки ваколатхона раҳбарлари эмас, балки улардан қуйи лавозимдаги дипломатлар иштирок этиб келган.
Ташанов Ўзбекистонда инсон ҳуқуқлари аҳволига эътиборни кучайтирган чет эл дипломатлари янги ҳукуматдан янги ўзгаришлар кутаётгани ва айни пайтда ўзаро мулоқотларда инсон ҳуқуқлари масаласини аввалгидан кучлироқ позицияда кўтаришни ваъда қилганини айтмоқда.
Ташкилотнинг бу галги ҳисоботи эса жами 6 бобдан иборат бўлиб, унда Ўзбекистонда сўз эркинилиги ва диний эркинликларнинг чеклангани, катталар ва болаларнинг меҳнатидан мажбурий фойдаланиш, фуқаролик жамияти вакилларига нисбатан босимлар ҳамда қамоқхоналарда қийноқлар қўлланишига оид жамият тўплаган маълумотлар жамланган.
Озодлик билан суҳбатда жамият фаоли кейинги бир неча ой ичида Ўзбекистонда фуқаролар ҳуқуқларининг таъминланишига оид баъзи ижобий қадамлар кузатилаётгани, жумладан, фуқаролар мурожаатларига қонуний жавоб беришга уриниш кузатилаётганини таъкидлади.
"Аммо, инсон ҳуқуқларининг пойдевори бўлган - сўз ва эътиқод эркинлиги, фуқаролик жамияти вакилларига нисбатан ноқонуний муносабат ва босим шакллари, қамоқхонада маҳбусларга нисбатан қийноқлар қўлланилиши ўзгармай қолмоқда", деди Абдураҳмон Ташанов Озодлик билан суҳбатда. http://www.ozodlik.mobi/a/28309369.html