Şöhrətindən danışır Azəribaycan Lerikin,

Bəs nədən yoxdu görən dərdinə dərman Lerikin?!
Yenə bir ailə köç etdi bu gün Abşerona
Sinəsi üstə keçir qəm dolu karvan Lerikin.
Bir tərəfdən Şuşaya, Zəngilana köçlər olur,
Bir tərəfdən boşalır əhli nigaran Lerikin.
Deyilir, bağ niyə əkmir və becərmir camaat?
Hələ gəlsin, gününü görsün o "bağban", Lerikin...
Məhsulun yol pulu vallah xeyirindən bahadır,
İnkişaf etməyinə yoxdu bir imkan Lerikin.
Yolu zay, iş yeri yox, cuzidi qaz xətti hələ,
Nə zaman bəs verilər xeyrinə fərman Lerikin?
Bir zamanlar yaşayan yüz yaşı yüzlərlə idi,
İndi on sakini varmı yaşı doxsan Lerikin?
Dözdü illər uzunu zülmə, çətinliklərə, leyk,
Olmadı bir çətini, müşkülü asan Lerikin...
Çünki az yaltağı, az alçağı, az qorxağı var,
Sığınıb səbrinə mərdanələri can Lerikin.
Hər lerikli olanın qəlbi Leriklə döyünür,
Yerini verməyəcək başqa bir ünvan Lerikin.
Mirfəyazəm, yaşaram dərdi məkanım ilə mən,
Bu dözülməz halına bağrım olur qan, Lerikin.
Mirfayaz Likməkani
30.10.2025