Бу дин меники!

Франциянинг унча катта бўлмаган савдо маркетларидан бирида кундалик эҳтиёжларини ҳарид қилиб юрган ниқобли ҳижобдаги муслима аёл керакли нарсаларни пештахталардан олиб бўлиб, ҳисобчиниг олдига келиб олган нарсаларини қўлидаги саватчадан чиқара бошлайди. Франциядаги ишчиларнинг кўп қисми чет элликлардан ташкил топганини ҳисобга олсак, сотувчи (яъни, ҳисобчи аёл) ҳам асли араб миллатидан бўлиб, араб давлатлари биридан келиб ишлаётган эди. Ҳисобчи аёлнинг ёпиқ жойидан очиқ ери кўп бўлишига қарамай кўзи ҳижобдаги муслимадан узилмас эди. Муслима аёл ҳам ҳисобчи тезроқ ҳисоб-китоб қилишини тик турганча кутарди. Тўсатдан ҳисобчи аёл муслимага бақрайиб қараб, насиҳат қила кетди: “Ҳой, бу ер сенга араб давлати эмас, қачонки ўз юртингга қайтсанг, ана ўшанда бунақа қилиб кийиниб юрасан. Бу ерга келишдан мақсадимиз, кўпроқ пул ишлаб юртимизда маза қилиб яшаш” – деди. Бу “насиҳатга” ҳижобли аёл парво ҳам қилмай, тезроқ ҳисоб-китоб қилишини хотиржам оҳангда айтиб: “Илтимос, мен ҳарид қилган нарсалар қанча бўлди, айтиб юборинг?” – деди. Муслимадан бошқача жавобни кутган сотувчи яна ҳам ғазабланиб: “Сенга нима деяпман? Францияда бундай ҳолатда юришинг, биз мусофираларни ишини қийинлаштиришинг ва ҳукумат биз чет эллик аёлларга босим қилиб юртимизга ҳайдаб юборишларига сабабчи бўлиб қолишинг, қисқаси ҳаётимизни, топар-тутаримизни қийинлаштириб юборишинг мумкин!” – деди. Муслима аёл бу гапларга парво қилмай сотувчи аёлдан яна сўради: “Мадам (хоним), қанча бўлди бизники?”. Ҳисобчи ўриндиғидан туриб ғазаб билан муслиманинг юзига яқинлашиб: “Мен сенга айтяпман, биз бу ерга пул ишлаш учун келганмиз, ватанга қайтгач динимизгаяна амал қилаверамиз. Агар сен динингни, ҳижобингни хоҳласанг жўна ватанинга, ўша ерда истаганингча амал қилаверасан” – деб дағдаға қилди. Шундан кейин ҳалиги муслима сотиб олган нарсаларини қўлидан аста ерга қўйиб, ён- атрофга бир-бир қараб, эркак киши йўқлигига ишонч ҳосил қилиб, юзидаги ёпинчиғини секин кўтариб очди. Карахт ҳолатига тушган ҳисобчи аёл қаршисида оқсариқ юзли, мовий кўзли француз аёл турган эди. “Ҳа мен муслимаман, мен сиз ўйлаган араб эмас француз аёлман. Мен шу ерда туғилдим, ота- боболарим ҳам француз, шу ерда мен Исломни қабул қилдим, шу дин меники, мен динимга Аллоҳ буюргани каби амал қилавераман. Сизлар динингизни ўтириб сотаяпсиз, биз уни тик туриб ялинганча сотиб оляпмие деган экан .