""""РИК|ЕЛАЙ АЛУДМИР"""""

Дашдемир Адилован тlвар милли эдебиятдал рикl алайбуруз фадлай таниш я.Ам
Стlал Сулеманан тlварунихъ галай Цицик (Зизик) хуьре 1926-йисуз кесибдин
хизанда дидедиз хьана.Кlварчагъа 8-класс ва 1957-йисузни Дербентдин
культпросветучилище кlелна акьалтlарна.Сифте хайи хуьре колхоздин клубдин
заведиш яз, гуьгъуьнлайни 26 йисуз анин культурадин кlвалин директор яз
кlвалахна.1957-йисалай эгечlна адан шиирар,критикадин макъалаяр райондин
"Колхоздин пайдах", республикадин "Социализмдин пайдах"
,"Лезги газет" газетриз,гьакlни лезги журналриз акъатиз
хьана.Уьмуьрда активный тереф кьунвай инсанрикай сад тир Дашдемир Хидировичан
эсерриз хцивал,метлеблувал ва вахтунин лазимлувал хас я.
Райондин ва республикадин лезги газетрихъ,журналрихъ галаз сих алакъа
хуьзвай активный мухбир Дашдемир Хидировичакай 1959-йисуз хуьруьн мухбиррин
республикадин совещанидин делегат хьана ва гьа и йисуз адаз ДАССР-дин Верховный
Советдин Президиумдин Гьуьрметдин грамота гана.Лезги писателрин Ассоциация
тешкилунин инициативный группадик кваз хьайи ам ЛПС-дин член,районда ва адалай
къеце кьиле физвай гзаф мярекатрин активный иштиракчи я. 2010-йисуз яшлу шаир
Д.Адилован Кьасумхуьрел кардик квай "Куьредин ярар" культурадин
центрадин типографияда "КУЗВА ЗИ РИКl, ЯЛАВ ГАЛАЗ" тlвар алай шииррин
кlватlал чапдай акъатна. И ктабда чна, шаирдин вичин тlалабунриз килигна, адан
эсерар гьа авайвал чап ийизва. КЪУЙ, ШАИРДИН АЛАКЬУНРИЗ КlЕЛЗАВАЙБУРУ ЧПИ
КЪИМЕТ ГУРАЙ. (Абидин Камилов, ЛПС-дин райотделенидин председатель)
ЛЕЗГИ ЧlАЛ.
Багьа я заз,уьмуьр хьиз,зи лезги чlал,
Ифирнавай чатухъандин къати цlал,
Рекьидалди акъат тийир кlарабрай,
Туруни хьиз,акъуддай зун азабрай.
Чlала тунва чи сивера мез ширин,
Ада чирна алуд ийиз дерт серин,
Къуват гана,гъалиб жедай,женгина,
Гьахьна рикlе къизмишвилин ялав хьиз,
Ам къекъвезва зи манид гьар бендина.
Дуствилелди,стхавилин къулав гъиз,
Руьгь кутуна чак садвилин,ашкъидин,
Чим гузава мерд рикlиз гьар лезгидин.
Рахурзава чlагъан,чуьнгуьр,далдам тар,
Машгьурзава хуш авазрал чи патар.
Эминанни Сулейманан ял галай,
Тарихдал чан хкиз авай зар алай.
(Д.Адилов)
ЛЕЗГИДИН РИКl.
Лезгидин рикl ухшамиш я къеледиз,
Са зеррени рехъ тагудай гьилледиз,
Раг кукlварна дараматар эцигдай,
Къаст авач а къастунив гьич гекъигдай.
Викlегьдаказ цlун ялаврай экъечlда,
Океандин лепейрикай хкечlда.
Къутармишда четин макъам инсанар,
Алудда фад тlебиатдин нукьсанар.
Ам чим къачуз эгечlда фад ракъинлай,
Кьейитlани элкъведач гьич женгинлай,
Таъсиб,намус хуьда Лезги Ватандин,
Ачухда шад лезги чилел межлисар.
Дегишвал тваз яшаишда,кьисметда,
Халкьди виниз хкажда ам, гьуьрметда,
Хьунухь патал агьваллу яз дуланмиш,
Жанлу рикlихъ зи халкь язва инанмиш.
Хиве кьадач эсиллагь гьич ажузвал,
Негь ийида эдебсузвал,гьахъсузвал.
Датlуз жеда хъсан крар суракьда,
Инсаният дуьз рекьел гъиз алахъда.
Дагълар хиве кьадач ада къизилдин,
Гележегдихъ ялварзавай несилрин,
Экуь гъед хьиз,лезги чилел куькlуьнда,
Шарвилидин рикl къеневаз къекъведа.
(Д. Адилов)