Топырақ астында қалған әрманлар

Қыршыннан қыйылды. Үзилди жанлар,
Ғырыстай бес жигит. Төгилди қанлар,
Бий мәўрит сум әжел қурығын салған,
Топырақ астында қалған əрманлар.
Еситкен де бундай суўық хабарды,
Салады түскинлик халға адамды,
Анаман: мениңде жаным қабарды,
Топырақ астында қалған əрманлар.
Жүр едиңлер тиршиликтиң ғамы деп,
Шийрин мийнетимниң хадал наны деп,
Ислейин, байрамға дейин тағы деп,
Топырақ астында қалған əрманлар.
Хызметтен шаршамай шаўып елим деп,
Метроға төгилди маңлай терим деп,
Қуўанып турмедиң күндей күлимлеп?
Топырақ астында қалған əрманлар.
Он гүлден бириде, ашылмай бағлар,
Зар әйлеп қалды-аў анайы зарлар,
Запырандай солды сүйикли ярлар,
Топырақ астында қалған əрманлар.
Жер бирден ойылып қалғанда басып,
Бир қуўыс табылмай кетерге қашып,
Ялғаншыдан кеткен көзлери ашық,
Топырақ астында қалған əрманлар.
Ақшолпан Аманияз 19.12.2019 жыл
PS: Ташкент метрополитени қурлысында қаза тапқан өримдей жас жигитлеримиздиң руўхына бағышлайман. Ата-аналарына сабыр тилеймен. Аллахым жатқан жерлери жарық болсын нәрестелердиң.