===== адкуль назвы?

=====
КАСТРЫЧНІК
У нас, беларусаў, кожны месяц мае канкрэтнае і зразумелае тлумачэнне назваў месяцаў. Возьмем асеннія: першы -- верасень, бо ў лясах у гэты час у буянстве верасовае цвіценне; трэці месяц -- лістапад, таму што ў яго перыяд адбываецца і заканчваецца лісцёвы апад з дрэў. А сярэдні месяц восені - кастрычнік, ад слова "кастрыца". Што такое кастрыца, ведаюць толькі людзі самага старэйшага ўзросту, бо гэта на іх долю выпала такая цяжкая праца, як вырошчванне і апрацоўка лёну і канапель.
Вечна вяскоўцы вялі натуральны вобраз жыцця: самі дабывалі сабе ежу, рыхтавалі вопратку. Асноўным матэрыялам для вытворчасці адзення былі лён і каноплі. Іх сеялі ў полі, палолі, а вырваўшы , лён слалі па зямлі, а каноплі вымочвалі ў вадзе, каб адзеравянелыя сцяблы сталі больш мяккімі. Падсушаныя сцяблы пераціралі на спецыльных прыладах, якія называюцца церніцамі. Перацёртыя астаткі-адходы называюцца "кастрыцай". Кастрыца ападала, а валакно аставалася ў руках. Валакно трапалі трапашкамі, і з яго вылятала самая дробная кастрыца. З ачышчанага валакна пралі ніткі. А кастрыца выкарыстоўвалася для гаспадарчых мэт: ёй уцяплялі гарышчы (над потолками) і прызбы хат , лёхі і пограбы.
У верасні звычайна ўбіралі бульбу, а ў кастрычніку скрозь па вёсках чуўся ляскат церніц, з- пад якіх сыпалася кастрыца -- дзеяўся кастрычнік. У наш час гэты працэс адышоў у нябыт.
Ну, а сам месяц -- гэта час асенніх пахаладанняў, туманаў і дажджоў. час замірання жывой прыроды і лістападу. Адлятаюць апошнія птушкі, а ў сонечныя дні плывуць над зямлёй падарожнікі лёгкага плавання -- павучкі на павуцінках.
А лес кліча грыбнікоў, журавінавыя балоты -- аматараў збору ягад, і толькі палі поўняцца глухой цішынёй.