У Наваградку затрымлівалі на 72 гадзіны і сёння вызвалілі з-пад варты гаспадара прыватнага музею, прыхільніка Руху "За Свабоду" Сяргея Лаўрушыка.

"Была заведзена адміністратыўная справа. Тыповая для сённяшняй Беларусі. За наяўнасць сцягоў і ўлётак, - распавёў пра справу сябра Руху Зміцер Солтан
Па ягоных словах, суд так і не адбыўся, бо адвакат звярнуў увагу на кепска складзеныя пратаколы, хутка перарабіць іх не змаглі, а тэрмін 72 гадзіны скончыўся.
Пры гэтым у любы момант могуць узбудзіць крыміналку. Справа ў тым, што ў мужчыны ёсць невялічкі прыватны музей, Пра яго ведае цэлы горад і пра яго пісалі мясцовыя газеты, у тым ліку дзяржаўныя.
"Музей падзелены на дзве часткі. Адна частка - старадаўнія бытавыя прылады. Другая прысвечана Першай і Другой сусветным войнам. Калі да Сяргея прыйшлі з вобшукам, зачапіліся менавіта за музейчык, прысвечаны войнам", - патлумачыў Зміцер.
Па ягоных словах. іржавыя штык-нажы, струхнелыя дэталі старадаўняй зброі хочуць раскруціць, як нейкі арсенал.
"Сяргея ў горадзе ведаюць і паважаюць. Калі справа дойдзе да суда, мы будзем інтэрпрэтаваць гэта, як чарговую палітычную справу і будзем бараніць яго ўсімі даступнымі законнымі сродкамі", - заключыў Зміцер Солтан.
Фота Радыё Свабода і Вольга Быкоўская