Распавядаем пра традыцыйныя строі беларускага касцюму.

Дзелімся апісаннем жаночага касцюму Неглюбскага строю!
Неглюбскаму строю ўласцівы комплекс з панёвай (тыпу платы), агульнае ўражанне ад якога — мажнасць i статнасць. У дзявочы гарнітур уваходзілі паясная адзежына «калышка», галаўны ўбор «кубак».
🎉 Святочны ўбор дапаўнялі шматлікія ўпрыгожанні са стужак, караляў, пацерак, гусінага пуху. Неглюбскі строй доўга захоўваў сваю архаічнасць і толькі ў 1920-я гады прыняў безрукаўку — «гарсэт».
Гэта адзіны комплекс, які захаваў у сваім складзе панёву — ворную паясную вопратку. Яе насілі з падваротам задняй часткі спадніцы за пояс. Важная асаблівасць: ніжні вугал павінен супадаць з верхнім краем вышыўкі на кашулі. Панёва была самай складанай па тэхніцы выканання часткай адзення.
Толькі ў Неглюбскі комплекс уваходзяць спецыяльныя «бялявыя» кашулі. Шырокі пояс выкананы ў спецыяльнай тэхніцы пляцення. Ніз пояса ўпрыгожвала махра з «пупламі». Тканая хустка з арнаментам завязвалася на матыў усходняга цюрбана.
📜 Неглюбскі строй адрозніваецца разнастайнасцю тэхнік ткацтва і багаццем вышыўкі, уключаны ў Дзяржаўны спіс гісторыка-культурных каштоўнасцей Рэспублікі Беларусь і намінаваны ў Спіс нематэрыяльнай культурнай спадчыны, які мае патрэбу ў тэрміновай ахове (ЮНЕСКА).
Ці цікава вам падрабязней даведацца пра арнамент і тэхнікі ткацтва гэтага строю? Пакідайце любы каментарый і мы падрыхтуем такі матэрыял у наступным месяцы!
Ілюстрацыя з кнігі «Беларускія народныя строі», Міхась Раманюк.
Крыніцы: Краеведение – основа духовного и нравственного возрождения общества: научно-практ. конф. (Гомель, 10-11 декабря 1997 г .). – Гомель, 1997. Ст. 62-63.
Романюк М.Ф. – Белорусская народная одежда – 1981. Ст. 12.