«Тәрбиәле» Зәмзәмиә

Был башҡорт ауылында аралаш рус ғаиләләре лә йәшәгәнлектән, иртә-кисен урамда ҡойма буйлап сусҡаларҙың хорхолдап йөрөүе ғәҙәти бер күренеш ине. Зәмзәмиәнең биш йәшлек улы Альберт ҡайҙандыр килеп сыҡҡан кескәй генә сусҡа балаһын сыйылдатып эләктереп тә алды. Ҡалала йәшәп, мал-тыуарҙы яҡындан күрмәгәнлектән, малайға сусҡа балаһының бесәйҙекенә лә, эттекенә лә оҡшамаған мороно бик мәрәкә булып күренде.