ВАЛ - куро ВКонтактесэ

ПАНАР /Людмила Рябова/
Исяк васов ильтия мон цëрань, –
Толонь паксяв таргавсь сонзэ кись.
Келя, идема тензэ масторонть, –
Мода алдо идемевсесь лиссь.
Ды сельгени куломасо, раказь,
Теке лодомс эрямонть поти.
Ламо ушмант изнямонзо якасть, –
Кона маштовсь, зярдояк а сти.
Велявтсть модакс сынь ды пиже нарокс,
Ашо каргокс оймест верев кузсть,
Варштасть верде цитниця чиналокс
Ды эрямо лия масторс тусть...
Мон цëранень викшнинь ашо панар,
Таргинь суре – якстере, прок чись, –
Кадык сон ветиця янокс ары,
Мекев кудов пачтявлизе кись.
Мон цëранень викшнинь ашо панар,
Таргинь суре – раужо, прок шкась, –
Кадык Пазось монь цëрынень ваны
Сетнеде, кинь пазозо арась.
Мон цëранень викшнинь ашо панар,
Таргинь оймень кородыця тешкст, –
Ведьс а ваи, толсояк а палы,
Кекшеви анеявоманть экшс.
Зярдо срады идемевсень виесь
Ды эрямось ушодови одс,
Лисян цëрань каршо, сырган чиезь,
Тапаряса мон вечкемам потс.
Кудос соватано, мери: «Авай,
Ванстымим панарот. Вана, сынь.
Бути таго оршамс сонзэ сави,
Содак вейкенть: изнятано минь.
Мельган сонзэ оршасы монь цëрам,
Секс илязо учо ятось шка.
Зярдояк а изняви мастором,
Пурнавозо вий куш кодашка».
Верепаз, илязо саво, саты!
Кадык Модась сови сэтьмечис.
Шказо – э р я м с...
Эрьвась эри кадык
Эсензэ ды маштовозтнень кис.
Людмила Рябова. #Вал #НародноеТелевидениеМордовии