Я МЕКТЕБ

Кц1ар районда Лезги ч1алан ва эдебиятдин
тарс тухунин гьалдикай
Лезги район, лезги хуьрер, лезги ч1ал,
Лезги ч1алал рахазва гьар хизан-к1вал.
Бес мектебра гьик1 я къе чи ч1алан гьал?!
Нукъсан квачирт1а, гудачир и суал:
Квачни лезги ч1алак макъсадни метлеб,
Герек кьадар тарс тагузвай, я мектеб?!
Малим лезги, аял лезги, тарсар магъул
Ч1алал тухуз, - саки вири я машгъул.
А ч1ал патал аяларни туш кагьул,-
Гьелбет, а гьалдални къвезва чух сагъул…
Лагь, лезги ч1ал сугъул тухунин себеб,-
Герек кьадар тарс тагузвай, я мектеб?!
Ч1агурна, нафтад ни квай, ширералд,
Гьар суз ц1ийи ктаб жеда сирейрал,
Магъул, инглис, урус ч1алан жуьредалд…
Вазни к1анда «Лезги ...» - ктаб, гьа саягъд…
Икрагь я хьи ктабрикай, ц1уру чеб,
Герек кьадар тарс тагузвай, я мектеб!
Ч1алар патал мешвере-к1ват1 тухузва:
Мисалар гуз, тапшуругъар къалузва,
Тартибдик кваз, алава чирвал гузвай…
Гьелбет, абур герек я, за лугьузва.
Бес чи ч1алан гьинва марифат, эдеб…
Герек кьадар тарс тагузвай, я мектеб?
Зун, ч1аларин, гьахьдач сур тир деринриз:
К1андач ч1аларин рафтарвал серинриз.
Чирвилер гун лайих я аферинриз…
Хайи ч1алан савад тахьун малимриз,-
Алакь тавун я, аялар авун желб…
Герек кьадар тарс тагузвай, я мектеб!
И саягъ ч1ал чир хьайит1а аялриз:
Гафарик квай асул гьарфар какадриз,
К1ел, кхьинар гъалат1ралди давамриз…
Элкъведа абур дидед ч1алан «авамриз».
Гъимир на жув гьалдал элди гудай себ…
Герек кьадар тарс тагузвай, я мектеб!
Гьар кьве салай ч1алан сятер т1имил хьун,
Адан чкадал, маса-«асул», тарсар гун,
Ч1алаз авай итиж, къвез-къвез, агъузрун…
И гьаларин, гьик1 гъавурда акьан чун?!.
Бес я, жемир, чи ч1ал патал, терс менсеб,
Герек кьадар тарс тагузвай, я мектеб!
Жуьреба – жуьре халкьарин ватан я…
Гьардаз чпин ч1ал, диде хьиз, масан я!
Асул макъсад, ч1ал чир авун хъсан яз,
Мектеб, вунни, чирвал гузвай макан я!
Ч1ала гъида, халкьдал, абур, мешреб, деб,
Т1алаб ая, къайгъуда хьухь, я мектеб!