Фикрет Хидиров

Ч1УЛАВ ЦАЦУН ВАЛ
Я гуьнедик квай ч1улав цацун вал,
Хци цацаралд наз - дамах ийиз.
Къацу махпурдин юкьвал - ч1улав хал,
Ч1улав хал хьунал вун бегел я низ?
Бязи валар хьиз, ала вал цуьквер,-
К1алуб дуьгмедин, хъипи седеф хьтин.
Рик1из къайи я, гъидач вуна хъвер,
Терс менсебдив гвай хц1и гьанеф хьтин.
Чара авачирдаз бакар къведа вун,
Ч1улав цацарин аламатвал чиз.
Туьк1уьрда вакай регъелни – жугъун.
Саллунни багъдин саламатвал хуьз.
Як1вни кьуьк гваз эгеч1да вав кас:
Кьуькуьв ярхариз, як1вув пун ат1уз.
Тухудай улакьди, дак1анвиляй цаз,
Квех хьиз галч1урда вун гуьнедай т1уз.
1989 й.
Къейд: садбуру и валуз «къараткен» лугьуда.
Фикрет Хидиров